Pantun anak mudo minang

Balayia kapa ka Puruih,

Singgah lalu ka Balai Cino,

Tolan sapantun cindai aluih,

Alun dipakai lah manggilo.

Kain putiah sasah jo sabun,

Bao ka aia buang daki,

Tolan sapantun kasah ambun,

Lusuah jo apo ka diganti?

Anyuik parian batali rumin, 

Panuah barisi galo-galo,

Tuan sapantun  kilek camin,

Di baliak gunuang tampak juo.

Ayam kinantan Sutan Bantan,

Disabuang anak Rajo Jambi,

Tolan lah buliah cincin intan,

Loyang tabuang anyo lai.

Bungo naneh bungo cimpago,

Lalu dikarang dipasuntiang,

Tolan ameh kami timbago,

Dima kabuliah samo kuniang.

Anak buayo dalam sumua, 

Mamakan ikan jo kulari,

Apo kadayo bintang timua,

Bulan lah jinak jo matohari.

Hari sadang  wakatu luhua,

Layang-layang babuni juo,

Tujuah hari di dalam kubua,

Kasiah sayang takana juo.

Pucuk katela pisang hutan,

Ureknyo dikakeh balam,

Allah Taala tolan bukan,

Takana juo siang-malam.

Antaro Kaliang jo Malako,

Di sinan bamban ditugakan,

Antaro kaniang dengan mato,

Di sinan dandam ditinggakan.

Panjang joroknyo Batu Mandi, 

Tampak nan dari Pulau Pandan,

Kok  tak takuik kami kamati,

Diguntiang hati dikirimkan.

Bungo cimpago kambang biru,

Tumbuah di Pulau Karek Rotan,

Bukan mudah manahan rindu,

Bak aia ditampuah sampan.

Aua mudo aua balanak,

Palapah lampaikan juo,

Tujuah jando sambilan anak,

Kaua kito sampaikan juo.

Siriah sakapua kurang sadah,

Antakan ka rumah Malin,

Amuah sakubua kurang tanah,

Amuah sakapan kurang kain.

                                                         

Bungo cimpago satu halai,

Tumbuah di kubua Tuan Haji,

Aia mato salamo carai,

Elok kasumua bakeh mandi.

Pacahlah cipia dilayangkan,

Pacah diimpik daun tarok,

Bukan sadikik disayangkan,

Muko bak cando minyak lalok.

Parapati tabang jo punai,

Tabang maraok masuak rimbo,

Bungo satangkai tigo bagai,

Tumbuahnyo dalam Lauik Cino.

Kayu ranggeh di Pulau Jantan,

Tampak nan dari Kurai Taji,

Cincin ameh parmato intan,

Bari mamakai jari kami.

Kamuniang di tapi tabek,

Jatuah malayang sularonyo,  

Putiah kuniang gigi barapek,

Panau mambayang di dadonyo.

Limau manih condong ka Tiku,

Tiku nan condong ka Pariaman,

Hitam manih singkok’an pintu,

Dagang tajelo di halaman.

Ujuang Cino tanahnyo kuniang,

Nan badakek jo Bangkahulu,

Ambo batanyo ka nan Kuniang,

Apo nan bangkak dalam baju?

Apo badantang di parahu?

Tupai malompek ka halaman,

Nan bangkak dalam baju,

Itulah surugo tampaik tangan.