Carito Lawak Minang _Maliang Durian

Maliang Durian

Untuak maisi kekosongan wakatu jo dari pado ndak ado karajo pai lah Trio Bingkaruang [Buyuang Togar jo Acong] maliang Durian.
- Durian sia tu Min ?
+ Durian sia juo lay sanak, Durian Pak Jorong lah 

Trio Bingkaruang mulai bajalan kabalakang Rumah Pak Jorong, karano lokasi batang Durian dibalakang rumah. Jo langkah lambek sarato ati-ati cando Tom ka manangkok Jerry akhianyo Trio Bingkaruang tibo dibawah batang Durian.

Lengong suok, kida, muko jo balakang dicaliak ndak ado urang, berarti situasi aman terkendali, Trio Bingkaruang pun mulai beraksi.
Acong jo Togar manjek batang Durian, sadangkan si Buyuang manunggu dibawah.

Tibo diateh batang Durian, Acong jo Togar mulai paniang mambedaan ma Durian masak jo ma Durian mudo, karano buah Durian nan tingga dibatangnyo tingga duo buah lay. Nan ciek warnanyo Kuniang nan ciek lay warnanyo Coklat.

Togar : "Nan ma Durian masak ko Cong?" (Basigayuik didahan batang Durian)
Acong : "Ndak tau den doh Gar, nan warna Kuniang tu ndak?" (Manunjuak-nunjuak buah Durian nan warna Kuniang)
Togar : "Ndak yakin den doh, tadi lah den idu-idu Durian nan warna Kuniang tu, tapi ndak ado baunnyo doh.."
Acong : "kalau nan warna Coklat?"
Togar : "samo se nyo, lah den idu-idu lo tadi jo iduang den, ndak lo ado baunnyo doh.."
Acong : "kito ambiak se lah kaduonyo baa?"
Togar : "jan lay Cong, kalau mudo ciek, mubazir beko, ndak juo ka kito makan doh..."
Acong : "cubo ang tanyo ka Buyuang Gar.."
Togar : "sip lah.. Yuaaaaaaang nan ma Durian nan lah masak ko? Nan warna Kuniang apo nan warna Coklat??" (Manakua kabawah)
Buyuang : "hmmm nan ma yo??" (Maningadah kateh batang Durian sambia malatak'an ujuang jari ka ikua, itu tando si Buyuang sadang bapikia sanak wkwkwkwk)
Togar : "jan lamo bana ang bapikia langau, ko karanggo banyak aa.." (Mamiciak karanggo dikatiak :D)
Buyuang : "ops tunggu nta, jan turun lo kalian dulu, den pai sabanta, beko den baliak liak..."

Buyuang pun pai maningga kan Togar jo Acong diateh batang Durian, samantaro tando tanyo sagadang mato panciang ikan Paus manari-nari dikaniang Togar jo Acong
"Kama lah si Buyuang tu??" Itu nan ado dalam pikiran Togar jo Acong..

Ndak lamo sudahtu, Buyuang tibo liak..
Buyuang : "sip kawan-kawan.. Den lah tau ma Durian nan masak "
Togar : "mantaaaap, nan ma Yuang? Nan warna Kuniang apo Durian nan warna Coklat?"
Buyuang : "nan warna Coklat.."
Acong : "yakin ang?"
Buyuang : "yakin lah, yakin pakai bana ko ha.."
Acong : "dari ma ang tau?"
Buyuang : "den tanyo lah.."
Acong : "ka sia ang tanyo?"
Buyuang : "ka Pak Jorong..."

Acong/Togar : "APO...???"
'Aw.. Aw.. Aw... Kumprang..!! Bruk..!!'
Togar jo Acong jatuah dari batang Durian dek takajuik. Tibo dibawah dipupuahnyo dek Acong jo Togar lari kancang sakancang Ayam dikaja Musang.. Samantaro si Buyuang hanyo diam tanpa kata mancaliak Togar jo Acong nan pontang pantiang dek lari, ndak lamo sudahtu tibo Pak Jorong sambia mambawo ladiang panjang, sapanjang Ota Caleg katiko Kampanye dimaso tanang 

Baa nasip si Buyuang?
Untuang elok bapihak ka Buyuang sanak, Pak Jorong hanyo manyuruah Buyuang manjek batang Durian untuak maambiak Durian warna Coklat nan lah masak, sudahtu Pak Jorong manyuruah Buyuang mangubak Durian tu jo Gigi, isi Durian dimakan Pak Jorong sadangkan kulik durian disungkahan Buyuang jo linangan aia mato wkwkwkwk..

By>
Dari kawan awak>>>